Ajit Pawar On Ladki Bahin Yojana : आगामी विधानसभा निवडणुकीच्या पार्श्वभूमीवर महायुती आणि महाविकास आघाडीने प्रचाराचं रणशिंग फुंकलं आहे. अशातच युती-आघाडीकडून नुकताच जाहीरनामा प्रसिद्ध करण्यात आला आहे. मुख्यमंत्री माझी लाडकी बहीण योजनेवरून मविआने महायुती सरकारला धारेवर धरलं आहे. लाडकी बहीण योजनेसाठी महाविकास आघाडीने 3000 हजार रुपये देण्याचं जाहीर केलं, यावर राज्याचे उपमुख्यमंत्री अजित पवार यांनी मुंबई तकच्या मुलाखतीत मोठी प्रतिक्रिया दिली.
अजित पवार नेमकं काय म्हणाले?
लाडकी बहीण योजनेसाठी महाविकास आघाडीने 3000 हजार रुपये देण्याचं आश्वासन दिलंय. 4 लाख रुपये बरोजगारांना भत्ता म्हणून देणार आहेत. 25 लाख विमा संरक्षणही देण्यात आलं आहे. तुम्हीही घोषणा केल्या आहेत. महाविकास आघाडी आणि महायुतीत नेमकी काय स्पर्धा सुरु आहे? या प्रश्नाचं उत्तर देताना अजित पवार म्हणाले, “ही गोष्ट खरी आहे. मागच्या वेळेस आम्ही अर्थसंकल्प सादर केला, त्यावेळी या सर्व योजना देत असताना सरकारला 75 हजार कोटी रुपयांचा आर्थिक भार उचलावा लागत होता. साडेसहा लाख कोटींचं बजेट होतं. त्यामध्ये 75 हजार कोटी रुपये या सर्व गोष्टींसाठी होते. मुलींचं मोफत शिक्षण, मुख्यमंत्री लाडकी बहीण योजनेसाठी दीड हजार रपये, वीज माफीसाठी 15 हजार कोटी रुपये लागत होते.
हे ही वाचा >> Uddhav Thackeray: ‘ अमित शाह लगे रहो मुन्नाभाईच्या सर्कीटसारखं…’, सांगोल्यात उद्धव ठाकरेंची तोफ धडाडली
बारावी, डिप्लोमा डिग्री आणि शिक्षणार्थींना 8 हजार कोटी रुपये, तीन गॅस सिलेंडर योजनेसाठी 2 हजार कोटी रुपये होत होते, दुधाचं इन्सेनटिव्ह 7 रुपये, या सर्वांसाठी मला 75 हजार कोटी रुपये लागत होते. त्यावेळी त्यांनी (विरोधक) आमच्यावर आरोप केले की, यांनी राज्याला दिवाळखोरीत काढलं. राज्य कर्जबाजारी केलं. यांच्याकडे पैसे कुठून आले? हे आता पगार थांबवतील. बिलं थांबवतील. केलेल्या कामाची बिलं मिळणार नाहीत. खूप वेगवेगळ्या पद्धतीनं विरोधकांनी आरोप केलं”.
